​​Motivasiya Məktubu Necə Yazılır? - Ən Çox Edilən 5 Səhv Və Onlardan Qaçış Yolları

Motivasiya məktubu xaricdə təhsil, təqaüd proqramları və ya iş müraciətləri zamanı ən vacib sənədlərdən biridir. Bu məktub sizin kim olduğunuzu, məqsədlərinizi və seçdiyiniz proqram üçün niyə uyğun namizəd olduğunuzu göstərir. Çox tələbə bunu yazarkən ümumi ifadələrdən istifadə edir və nəticədə digər namizədlərin arasından seçilməsi çətinləşir. Əgər sən də düzgün yazmağın sirlərini axtarırsansa, bu məqalədə həm düzgün yazma üsullarını, həm də ən çox buraxılan 5 səhvi və onların həll yollarını öyrənəcəksən.

Motivasiya Məktubu Niyə Vacibdir?

Motivasiya məktubu sadəcə bir kağız parçası deyil, bu sənəd sənin daxili dünyanı və məqsədlərini əks etdirir. Universitetlər üçün bu, CV-dən daha çox əhəmiyyət daşıyır. Məktubda göstərdiyin motivasiya, məqsəd və planlar sənin seçim şansını ciddi şəkildə artıra bilər.

Digər tərəfdən, motivasiya məktubu sənə özünü təqdim etmək imkanı verir. Bir müsahibəyə çağırılmadan əvvəl ilk təəssürat məhz bu məktub vasitəsilə formalaşır. Ona görə də, məktubunu nə qədər səmimi, aydın və məqsədyönlü yazsan, uğur qazanma şansın da o qədər çox olar.

Motivasiya Mektubu Quruluşu Necə Olmalıdır?

Motivasiya mektubu qarışıq və uzun olmamalıdır, əksinə, sistemli və oxunaqlı şəkildə yazılmalıdır. Ümumiyyətlə, məktubun 3 əsas hissəsi olur:

1. Giriş – Özünü qısa təqdim et, hansı proqram və ya təqaüdə müraciət etdiyini bildir.

2. Əsas hissə – Təcrübələrini, bacarıqlarını və gələcək planlarını ətraflı izah et. Burada seçdiyin sahəyə niyə marağın olduğunu xüsusi vurğulamalısan.

3. Nəticə – İdeyalarını yekunlaşdır və seçildiyin halda necə fayda verəcəyini qeyd et.

Bu struktur həm oxuyan şəxs üçün rahatlıq yaradır, həm də məktubunun daha peşəkar görünməsinə kömək edir.

Ən Çox Buraxılan 5 Səhv və Onlardan Qaçış Yolları

1. Ümumi və şablon ifadələrdən istifadə etmək

Çox tələbə motivasiya məktubu yazarkən internetdən tapdığı hazır cümlələri kopyalayır. Bu yanaşma sənə heç vaxt üstünlük qazandırmaz, çünki hər kəs eyni sözlərdən istifadə edir. Əvəzində, məktubunu öz şəxsi hekayən və təcrübələrinlə bəzəməlisən.

Qaçış yolu: Öz həyatından nümunələr gətir. Məsələn, niyə həmin ixtisası seçdiyini və ya hansı təcrübənin səni bu qərara gətirdiyini yaz.

2. Çox uzun və ya çox qısa yazmaq

Motivasiya mektubu çox uzandıqda oxuyan adam marağını itirir, çox qısa olduqda isə sənin niyyətini anlamaq çətinləşir. Orta uzunluq 400-600 söz arası olmalıdır.

Qaçış yolu: Mətnini yazdıqdan sonra bir dəfə də oxuyaraq artıq təkrar olunan sözləri sil. Əsas məqamları vurğula, amma mövzudan kənara çıxma.

3. Qrammatik və dil səhvləri buraxmaq

Bu rəsmi sənəd sayıldığı üçün orada yazı səhvləri çox pis təəssürat yaradır. Təqaüd komitəsi belə səhvləri sənin məsuliyyətsiz yanaşman kimi qiymətləndirə bilər.

Qaçış yolu: Məktubunu tamamladıqdan sonra onu bir neçə dəfə oxu və dostuna yoxlatdır. Hətta dil qaydalarını yoxlamaq üçün onlayn vasitələrdən istifadə edə bilərsən.

4. Özünü həddindən artıq tərifləmək

Bəzi namizədlər məktubunu  öz uğurlarının siyahısına çevirir. Halbuki, məktub sadəcə CV-nin təkrarı deyil. Burada əsas məqsəd sənin şəxsi motivasiyanı və niyə bu proqram üçün uyğun olduğunu göstərməkdir.

Qaçış yolu: Uğurlarını qeyd et, amma onları motivasiyanın bir hissəsi kimi təqdim et. Məsələn, “Bu layihədə iştirak etməyim mənə liderlik bacarıqlarımı inkişaf etdirməyə kömək etdi” kimi ifadələr daha balanslıdır.

5. Gələcək planlardan danışmamaq

Yazı  yalnız keçmiş uğurlardan ibarət olmamalıdır. Komissiya sənin gələcəyə baxışını da görmək istəyir. Əgər planlarını göstərməsən, məktubun natamam görünəcək.

Qaçış yolu: Gələcəkdə hansı sahədə ixtisaslaşmaq istədiyini və həmin proqramın sənə bu yolda necə dəstək olacağını izah et. Bu, həm motivasiyanı göstərir, həm də planlı bir namizəd olduğunu sübut edir.

Motivasiya Məktubu Yazarkən Əlavə Məsləhətlər

Motivasiya məktubu’nun təsirli olması üçün sadə, amma təsirli bəzi məsləhətləri də nəzərə almalısan. Əvvəla, məktubunu həmişə səmimi üslubda yaz. Çox rəsmi və ya süni cümlələr oxuyanı bezdirə bilər. Bundan başqa, hər məktubu eyni formada göndərmək əvəzinə, müraciət etdiyin proqrama uyğunlaşdır.

Digər bir məsləhət – məktubunu həmişə pozitiv notla bitir. “Bu proqram mənim gələcək karyeram üçün mühüm addım olacaq” kimi ifadələr oxuyanlarda müsbət təəssürat yaradır.

Nəticə

Motivasiya mektubu təhsil və karyera yolunda ən vacib sənədlərdən biridir. Düzgün yazılmış məktub səni onlarla namizəd arasından seçdirə bilər. Ən əsası isə, burada  sənin şəxsiyyətin və məqsədlərin parlamalıdır.

Unutma ki, yazarkən edilən səhvlərdən qaçmaq uğur şansını qat-qat artırır. Əgər sən də təqaüd proqramlarına, xaricdə təhsilə müraciət etməyi düşünürsənsə, bu yazıda bloqda qeyd olunan məsləhətləri tətbiq et. Əgər peşəkar dəstəyə ehtiyacın varsa, mütləq bizimlə əlaqə saxla.

Şəkillər: